Galatians 6
Ukwenza Okulungileyo Kubo Bonke
1Bazalwane, uma umuntu ehilelwe yisono esithile lina abomoya kumele limbuyise kakuhle. Kodwa lizinanzelele; lani futhi lingalingwa. 2Thwalani imithwalo yomunye lomunye, ngalokho lizagcwalisa umthetho kaKhristu. 3Uma umuntu ezitshaya ulutho yena engasilutho, uyazikhohlisa. 4Umuntu ngamunye kahlole izenzo zakhe. Ngalokho angaziqhenya, kungekho ukuziqathanisa lomunye, 5ngoba lowo lalowo kumele athwale umthwalo wakhe. 6Loba ngubani othola ukufundiswa ngelizwi umele abelane zonke izinto ezinhle lalowo omfundisayo. 7Lingakhohliswa: UNkulunkulu angeke ahlekwa. Umuntu uvuna lokho akuhlanyelayo. 8Lowo ohlanyela ukuthokozisa imvelo yakhe yesono, kuleyomvelo uzavuna ukuchitheka; lowo ohlanyela ukuthokozisa uMoya, kuMoya uzavuna ukuphila okulaphakade. 9Kasingadinwa yikwenza okuhle, ngoba ngesikhathi esifaneleyo sizavuna isivuno uma singadeli. 10Ngakho-ke, njengokuba silethuba, kasenzeni okulungileyo ebantwini bonke, ikakhulu kulabo abangabemuli yabakholwayo.Hatshi Ukusoka Kodwa Indalo Entsha
11Khangelani ukuthi makhulu kanganani amabala engiwasebenzisayo lapho ngililobela ngesami isandla! 12Labo abafuna ukubukwa ngaphandle bazama ukulicindezela ukuba lisoke. Isizatho sinye sokuba benze lokhu yikuba babalekele ukuhlukuluzelwa isiphambano sikaKhristu. 13Lalabo abasokileyo kabawulaleli umthetho, kodwa bafuna ukuba lisoke ukuze bazincome ngemizimba yenu. 14Mina kangingazincomi lanini ngaphandle kwangesiphambano seNkosi yethu uJesu Khristu, umhlaba wonke owabethelwa ngaso kimi, lami njalo emhlabeni. 15Ukusoka loba ukungasoki akutsho lutho; okuqakathekileyo yikudalwa kutsha. 16Ukuthula lesihawu kubo bonke abalandela umthetho lo, kanye laku-Israyeli kaNkulunkulu. 17Okokucina, akungabi lamuntu ongibangela uhlupho, ngoba emzimbeni wami ngilezimpawu zikaJesu. 18Umusa weNkosi yethu uJesu Khristu kawube lomoya wenu, bazalwane. Ameni.
Copyright information for
NdeIBE